ക്രൈസ്തവ വിശ്വാസിക്ക് മരണം ജീവിതത്തിന്റെ അവസാനമല്ല: ലിയോ പതിനാലാമൻ പാപ്പാ
മരണമടഞ്ഞ വിശ്വാസികൾക്കുവേണ്ടിയുള്ള പ്രാർത്ഥനകൾ ജീവിതത്തെക്കുറിച്ചുള്ള പ്രത്യാശ വെളിപ്പെടുത്തുന്നതാണെന്നും, അത് ജീവന്റെ ആഘോഷമാണെന്നും ലിയോ പതിനാലാമൻ പാപ്പാ. കഴിഞ്ഞ ഒരു വർഷത്തിൽ മരണമടഞ്ഞ കർദ്ദിനാൾമാർക്കും മെത്രാന്മാർക്കുമായി നവംബർ 5 വ്യാഴാഴ്ച രാവിലെ 9 മണിക്ക് വിശുദ്ധ പത്രോസിന്റെ ബസലിക്കയിൽ വിശുദ്ധ ബലിയർപ്പിച്ച അവസരത്തിലാണ്, മരിച്ചവർക്കുവേണ്ടിയുള്ള പ്രാർത്ഥനയ്ക്ക് കത്തോലിക്കാസഭയിലുള്ള പ്രാധാന്യവും, വിശ്വാസജീവിതത്തെ സംബന്ധിച്ചിടത്തോളം അതിനുള്ള അർത്ഥവും സംബന്ധിച്ച് പരിശുദ്ധ പിതാവ് ഉദ്ബോധിപ്പിച്ചത്.
മരണം ജീവിതത്തിന്റെ അന്ത്യമല്ലെന്നും ക്രിസ്തുവിന്റെ ഉയിർപ്പ് വഴിയായി മനുഷ്യജീവിതം വീണ്ടെടുക്കപ്പെട്ടതാണെന്നുമുള്ള ബോധ്യവും വിശ്വാസവുമാണ് മരണമടഞ്ഞവർക്കുവേണ്ടിയുള്ള പ്രാർത്ഥനയിലൂടെ നാം പ്രഘോഷിക്കുന്നത്. വിശുദ്ധ മോനിക്ക, തന്റെ മക്കളായ അഗസ്റ്റിനോടും നവീജിയൂസിനോടും വിട പറയുന്ന അവസരത്തിൽ, അവർ എവിടെയാണെങ്കിലും കർത്താവിന്റെ അൾത്താരയിൽ തന്നെ അനുസ്മരിക്കണമെന്ന് പറഞ്ഞത് പ്രസംഗമധ്യേ പരിശുദ്ധ പിതാവ് പരാമർശിച്ചു.
മരിച്ചവർക്കുവേണ്ടി പ്രാർത്ഥിക്കുക എന്നത് സഭയുടെ അടിസ്ഥാനപരമായ കടമകളിലൊന്നാണെന്ന് പ്രസ്താവിച്ച പാപ്പാ, ഉത്ഥിതനിലുള്ള വിശ്വാസവും പ്രത്യാശയുമാണ് ഇത്തരം പ്രാർത്ഥനകളുടെ അടിത്തറയെന്ന് ഉദ്‌ബോധിപ്പിച്ചു.
ഭയമില്ലാതെ വിശ്വാസത്തോടെ വേണം മരണത്തെ സമീപിക്കേണ്ടതെന്ന് ഓർമ്മിപ്പിച്ച പരിശുദ്ധ പിതാവ്, മരണത്തിലൂടെ മനുഷ്യർ തമ്മിലുള്ള ബന്ധങ്ങൾ എന്നന്നേക്കുമായി അവസാനിക്കുന്നില്ലെന്നും ക്രിസ്തുവിൽ അവ പുതിയൊരു ആത്മീയ തലത്തിലേക്ക് രൂപാന്തരപ്പെടുകയാണെന്നും വിശദീകരിച്ചു.
"വിശുദ്ധരുടെ കൂട്ടായ്മ" എന്ന ആശയത്തെക്കുറിച്ച് പ്രതിപാദിച്ച പാപ്പാ, മരിച്ചവർക്കുവേണ്ടി പ്രാർത്ഥിക്കുമ്പോൾ, നാം അവർക്കുവേണ്ടി മാത്രമല്ല, അവരോടൊപ്പം കൂടിയാണ് പ്രാർത്ഥിക്കുന്നതെന്ന് ലിയോ പതിനാലാമൻ പാപ്പാ ഓർമ്മിപ്പിച്ചു.
2025 ഒക്ടോബർ മാസം മുതൽ 2026 ഒക്ടോബർ മാസം വരെ ലോകത്ത് ഏഴ് കർദ്ദിനാൾമാരും 136 മെത്രാന്മാരുമാണ് അന്തരിച്ചത്. ദൈവത്തിന്റെ കരുണയുള്ള പിതൃസ്നേഹത്തിൽ മരിച്ച വിശ്വാസികൾക്ക് ഇടം ലഭിക്കട്ടെയെന്നും നീതിയും സമാധാനവും ലോകത്തിൽ വളരട്ടെയെന്നും പാപ്പാ പ്രാർത്ഥിച്ചു.